LINTANG ATIKU

1. WIDYA  KANCA  KENTHELKU

   DENING :  ENDAH  INDUNG

BAG : 1



  Sore  iku,  aku  lagi  nyirami  kembang  ing  plataran  ngomah.  Kebeneran  yen  dina  minggu  ngene  iki  aku  siaran  esuk,  jam  08.00  nganti  jam  10.00.  Dene  yen  saliane  dina  setu  lan  uga  minggu,  aku  siarane  sore  saka  jam  15.00  nganti  jam  17.00.  Ateges,  sore  iki  aku  bisa  nyirami  kembang  kang  pating  ngrembuyung  nemsemake  iku.  Kanggoku,  saben  nyawang  kembang-kembang  iku  bisa  dadi  tamba  awak  kang  lagi  sayah.  Apamaneh  yen  saben  mulih  siaran  kae.

   Awit  biyen  aku  pancen  seneng  nandur  kembang.  Dudu  kembang  kang  regane  yutanan  kaya  anturium,  germani,  aglonema  utawa  gelombang  cinta  kang  nate  booming  ing  taun  2008an  kae.   Ananging  kembang  kang  prasaja  bae.  Kayata:  kembang  mawar,  aster,  pacar  tumpuk,  ceplok  piring,  kembang  songgo  langit,  sosor  bebek,  kembang  sepatu,  kembang  esuk sore,  kembang  kertas  kang  dadi  kembang  kang  banget  daksenengi.  Lan  uga  kembang  protosely  kang  jarene  Mbak   Tria,  kang  asli  Sleman kae jarene yen ngarang  kembang  protosely,  kembang  kenikir  landa.  Dene  yen  ngarani  kembang kenikir  sing  godhonge  ora  enak  dipangan  diarani  kenikir  jawa.

  Kembang  protosely  iku,  kejaba  kembange  wangi  lan  uga  katon  endah disawang ,godhonge  uga  enak  dimaem.  Digawe  trancam,  pecel  utawa  urap.  Mamak  uga  asring  gawe  urap  nganggo godhong  protosely,  tanduran  asal saka.  Kadhangkala  aku  geli-geli  piye  ngono, aneh-aneh  bae  diarani kenikir  landa  lan uga  kenikir  jawa.  Mbokmenawa  kanggo mbedakake  jinise. 


   Jarene  Mbak  Furi,  kancaku  kang  asli  Indramayu,  kang  saiki  domisili  neng Menawa,  melu  sisihane  iku,  yen  neng Sunda,  kenikir  iku  diarani  sintrong, dene  tanduran  kang  ing  Magelang  kene  diarani  sintrong,  dene  neng  Sunda  kana  diarani  tespong.  Beda  dhaearah  beda  anggone  ngarani  ya,  he  he  he.

   Pancen,  kadhangkala  jeneng  kembang  utawa  jeneng  tanduran  liyane, wujude  padha,  ananging  anggone  ngarani  iku beda-beda.  Kaya  ing  dhaerahku  dhewe  iki  misale.  Kembang  pukul  empat,  ing dhaerahku,  tepate  ing  dhusunku,  luwih  populer  diarani  kembang  esuk sore. Diarani  kembang  esuk  sore  mergane,  kembang  kang  nduweni  jeneng ilmiah  utawa  nama  latin   iki, megare saben  esuk  lan  uga  sore. Ana uga  kang  ngarani  kembang  sempritan, merga  yen putik  lan  benang  sari-ne  dijupuk  lan banjur  disebul,  bisa  muni  kaya  sempritan. Biyen  aku  uga  yen  ngarani  kembang  asal   iki,  kembang  sempritan.

    Aku  dadi  kelingan, biyen  nalika  aku  isih  cilik   kae,  saben  bubar  ngaji  saka  kombongan,  kang  saiki  diarani  TPA,  utawa  Taman  Pendidikan  Al- Qur'an,  aku, Widya  lan  uga  kanca-kanca  liyane,  asring dolan menyang  dalemme  Bu  Tri,  kang  ngasta  Kepala  Sekolah  ing  salahsiji  SD  kang  manggon  ing  kecamatan  Pakis.  Aku  lan  kanca-kanca  asring  dolan  ing  dalemme  Bu  Tri  mergane  ing  plataran  dalemme  akeh  banget  wit  kembang  esuk  sore.  Aku  lan  kanca-kanca  asring  ngopeki  kembange  lan  banjur  digawe  sempritan.  Mesthine  sawise  matur marang  Bu  Tri  utawa  salahsiji putrane. Pancen,  Bu  Tri  iku  kagungan  putra  telu  wadon  kabeh,  yen  istilah  jawane  diarani  gotong  mayit. 

  Ora  saben  kembang  esuk  sore bisa digawe  sempritan,  aku  dhewe  wektu  iku anggone  ngopek  nganti  pindho  ping  telu lagi  bisa  muni.  Nanging  mbokmenawa  uga  pinter-pintere  anggone  milih  nding,  wong  nyatane  yen  Widya sing milih  ngono  kae  bisa  langsung  muni.  Kembang  esuk  sore  iki, kejaba bisa ngendhahake  pekarangan  omah, wit  iki uga  bisa  dadi  tanaman  herbal.   Amarga  godhonge  bisa  matengake  wudun.  Dene  wohe  kang  wis  tuwa,  kang  warnane ireng bisa   jerawat  kanthi  wohe  iku didheplok  banjur .

  Ing  plataran  omahku,  uga  ana  wit  kembang  kang  uga  dadi  ancer-ancer  omahku.  Amarga,  ing dhusunku omah kang  ana  wit  kembang  kang  asring  ditemokake  ing  sekolah-sekolah  iku, mung  omahku.  Oiya,  isih  ana  maneh,  kembang  iki  paling  istimewa  kanggoku.  Bisa  diarani  kembang bkesayangan.  Yen biyen  ana  sinetron  Topi Tersayang, dene iki  Kembang  Tersayang, he  he  he.  Kembang  anggrek  bulan  werna  ungu  semu  abang  ati.  Kembang  iki  bebungah  saka  Mas  Fikri,  nalika  aku  ambal  warsa  kang  kaping  19,  setaun  kepungkur.

   Kembang  iki  nate  arep  digenteni  dening Pak  Darkan,  juragane  Bapak  kang  biyasa pesen  kranjang  buwah.  Ngendikane, arep dicaosake  kagem  Bu  Atri,  garwane  kang  pancen  remen nandur kembang.  Aku  matur  yen kembang iku  ora  tak  dol.  Nanging  aku  ora matur asale  kembang  iku,  mundhak  dikira curcol he he he.  Alesanku  ya  mung  gawe  hiasan  ngomah  lan  uga  gawe  duwek- duwek  bae.

   Aku  ora  maido  yen  Bu  Atri ya garwane Pak  Darkan  iku,  remen  nandur  kembang.  Ing  ndalemme  kang  manggon  ing  Tepus  Wetan,  platarane  akeh  banget  wit  kembang,  klebu  kembang  sing  larang  kaya  gelombang  cinta  lan  uga  anturium.  Kembang  pacar  tumpuk  kang  daktandur  ing  plataran  ngomahku, wohe  uga  anggone Bapak  nyuwun  saka  daleme  Pak  Darkan.

   Wit  kembang  kang  kembange  warna- warni  lan  uga  bisa  gawe  pitekan  kuku  iku, wite  uripan  alias  gampang  banget  urip. Yen  wohe  kang  wis  tuwa  mecah  lan  ceblok  ing  lemah  bae,  bisa  thukul   lan  urip.  Malah  saking  uripe  lan  ngrembuyung  kethel,  wite  kadhangkala  dibabat  dening  Simbah  kanggo  ngarit.

  Mbahas  kembang  anggrek  maneh  bae  ya,  he  he  he.   Kembang  anggrek  bulan  iki, tansah  dakrumat  kanthi  becik  kaya  kembang  kembang  liyane.  Mung  bae, kembang  siji  iki  nggonku  ngrumat  rada beda, istimewa-lah  istilahe, he he he.  Ora beda  kaya  ngrumat  anggonku  kekancan  karo  sing  menehi  kembang,  Mas  Fikri. 

   Amarga,  priya  siji  iki  asring  banget  gawe  aku  baper,  alias  terbawa  perasaan.  Yen  aku  ora  bisa  ngendhalekake  atiku, mbokmenawa  rasa  kang  biyen  nate  perlik-perlik  ing  atiku,  saikine  wis  ngrembuyung.  Bejane,  rasaku  marang  Mas  Fikri  mung  sadermo mengagumi  dudu  tresna.  Yen  rasaku  biyen  iku  diarani  tresna,  lakya  aku  mung patah  hati  dot  com  merga  mesthi  bertepuk sebelah  tangan. Paribasane  bagai  pungguk  merindukan  bulan.